華華唔係亂估o架！話說噚日華華收到風，最近李福兆入則申請，將中半山堅尼地道2至8號，重建做一幢連會所設施，共25層高嘅豪宅。塊地係由赫赫有名嘅東亞銀行（023）李氏家族、李國寶阿爺李冠春喺上世紀二、三十年代買落做祖屋，舊年李氏家族就塊地嘅業權再分配，李福兆一房攞到四分三。申請喺上個月已經批咗，塊地可建樓面大概6.2萬方呎。如果以樓價每方呎3萬蚊計，落成市值差唔多18.6億銀。
翻查資料，早喺校長去泰國隱居之後，李福兆家族已經狂沽香港嘅物業，就好似99年李福兆家族就以7.8億銀，將壽臣山道東1至9號20幢新簇簇嘅洋房，賣咗畀新加坡基金GRA。
校長唔經唔覺都喺泰國隱居咗差唔多17年，家陣年逾八十，已經係耄耋之年，近年泰國加拿大兩邊走，又四圍去旅行，嘆世界享受人生。佢舊年返香港出席證券商協會成立30周年酒會，金融界對佢仍然係非常尊重。華華記得，佢當時接受某傳媒訪問，話香港競爭大，大把發展機會，但自己已經退休，過咗拼搏嘅階段，所以唔想返嚟嘞。不過，中國人有句說話「人離鄉賤，物離鄉貴」，尤其上咗年紀嘅長輩，離開家鄉總係想尋根，校長將祖屋重建成安樂窩，為回歸香港做準備，又唔係冇可能噃！
李華華
mailto:
[email protected]