下星期二(17日)香港主場上演世界盃外圍賽中港大戰,之前球迷撲飛已經引發好多不滿,到比賽嗰日,中港矛盾誓成比賽焦點,江湖流傳因為呢場波太敏感,政府高層下令司局長最好唔好入場睇波,仲話免得過唔好隨便表態撐邊隊,朝中屆時至少有財爺曾俊華同劉江華「咁啱飛咗」,但有建制中人建議特首梁振英入場兼表態撐香港隊喎。
八方聽聞,其實好多關場波事嘅司局長,剛好比賽日不在港,好似上次有入場睇港隊嘅財爺,嗰日剛好去咗土耳其,冇得再入場睇波撐港隊,唔使做人生的抉擇。至於主責體育事務嘅民政事務局局長劉江華,稍後又咁啱要飛,響應CY號召搞內交,所以都係「逼不得已」無法入場捧港隊囉。但佢嘅政治助理徐英偉,近日則喺fb留言「香港勁揪」,繼續撐港隊,唔通係抗旨之舉?