中國外運（598）喺國企當中，超級大落後，啱先開波，買。中外運2012年半年純利仲倒退一成過外，但第三季發力，首三季純利6.5億銀人仔，已經追到2011年同期表現。又上年10月以嚟，祖國進出口數據相當靚仔，就好保守當集團全年度純利有輕微單位數增長，PE仲企嚟8倍單位數。而環球及祖國經濟恢復動力，今年更勝舊年，純利係咁意增長10%，預期PE得番7字頭單位數。再講，中外運家陣仲喺金融海嘯價浮沉，PB得0.5倍，殘到爆。資金揀落後，實郁到佢。而呢啱喺長假前，即8號嗰日，集團以今年以嚟大成交1,300萬股，升穿咗半年橫行頂，有資金落手。買中外運，擺中線，2013年度PE上番10倍，要見兩蚊過外，潛在回報率33%。

中國稀土現金牛

中國稀土（769）已經發咗2012年度盈警，唔使心掛掛。而集團稀土產品，喺受惠環球製造業復蘇，業績變返靚仔前，股價喺三年低位打底PB又得0.7倍，加埋淨現金12億銀，係超級現金牛。又經過呢期牛皮，中國稀土幾條平均線叠埋一齊，有勢發動短期攻勢。呢轉短打博升20%到2.09元，未有耐上到NAV。

錢雋