林子聰同何基佑今日帶同分別21個月及28個月大嘅囝囝，喺灣仔幼兒中心宣傳ViuTV節目。佢哋會喺節目中走訪唔同家庭提供免費育兒教育，肥仔聰因為要成日去外地工作唔喺屋企，所以阿仔林奕滔見到佢時會特別黐身：「返到屋企會扯住我唔放，有時出門做嘢要趁佢瞓覺先走，如果喺外地視像通話，佢錫個電話芒。」

何基佑諗返第一次離開阿仔何清義，飛到北京工作兩日，笑言自己當時太唔捨得，喊住出門口：「我好眼淺，真係好唔捨得。」而肥仔聰指阿仔出世當日，喺產房剪臍帶後，佢就要趕返大陸做嘢，最後搏到盡提早完成，趕返香港接太太出院，隨住阿仔慢慢大個，肥仔聰抱到有「爸爸手」，背脊肌肉扯住痛。