韓國男團Super Junior(SJ)嘅唯一人夫晟敏，日前畀其中一個韓國粉絲後援會「DCInside Super Junior Gallery」(SJ Gallery)抵制，SJ Gallery指晟敏長期無視粉絲，而且處理結婚一事嘅態度又令粉絲不滿，所以要求晟敏退團，引起其他粉絲熱議。及後有指SJ計劃與粉絲召開懇談會討論，似乎想為事件降溫，不過晟敏嘅音樂劇演員老婆金思垠喺Instagram嘅舉動就令更多韓國粉絲不滿。

金思垠透過IG點「讚」支持老公晟敏留喺SJ嘅圖片，另外一張讚好嘅相包括「Worldwide ELF」狠狠打「Korean ELF」一巴嘅畫，以行動力撐老公，不過就因為後者嘅畫引起粉絲不滿。事實上，晟敏自2014年宣佈結婚一事後，對於韓國粉絲嘅反感，反而海外ELF(SJ粉絲名稱)大多予以體諒，喺今次要求晟敏退團嘅事件中，海外粉絲亦多數認為係韓國粉絲反應過激。

不過喺敏感關頭上金思垠嘅做法，對韓國粉絲無疑係火上加油，有粉絲認為金思垠咁做係想獲得海外粉絲嘅同情票，紛紛留言表示：「似乎刻意點讚」、「咁無視粉絲不如唔好做藝人」、「呢個時候點解你(金思垠）唔可以保持安靜？」等。