【冇減價空間】黃翊餐廳生意大受影響 冰室一日要用一盒口罩
蘋果日報 2020/03/24 06:00
黃翊
這年頭做香港人認真難捱，自去年中開始至今長達9個多月的逆權運動仍未平息，同時又遇上武漢肺炎肆虐，而且還開始在本地社區爆發，令本來已經歷低潮的各行各業雪上加霜。
為降低感染風險大家都盡量減少外出和聚餐，導致飲食業更首當其衝，其中在大埔擁大牌檔和冰室的歌手黃翊，日前在大埔的冰室接受《蘋果》訪問時直言，疫情影響較社會運動更深更廣，始終社運大多屬地區性，但今次疫情是全方位。
提到大牌檔和冰室的影響，黃翊稱大牌檔所在的政府場地，上星期開始為期半年的翻新維修，連帶大牌檔亦跟隨停業，他說：「其實停業前生意已經好大影響，因為大牌檔主要做晚市，而家根本無人出街晚飯，有啲朋友話我哋好彩，但我唔係咁諗，始終全行都一齊捱緊，暫時惟有專注冰室呢邊先。」
黃翊要求冰室所有員工都要提高衞生意識，他說：「全部員工都要戴口罩，每個鐘頭要清潔消毒洗手間，樓面枱凳同大門都要抹，其實我哋都唔知啲病菌幾時會嚟到，惟有盡量做。」他又表示冰室每日要營運，對口罩和清潔用品的消耗亦不少：「講真樓面、廚房加水吧，夾埋一間舖成十個人，一日三個口罩，有時有啲客人冇口罩我哋又會畀個佢，一日一盒走唔甩㗎喇。」
面對生意下跌，可有研究甚麼救亡措施，例如減價？黃翊直言沒有減價空間：「但一定唔敢加價，你話賺錢就冇㗎啦，好彩暫時唔使過街市嗰邊，惟有多啲嚟幫手，做清潔同陪客人傾吓偈。」提到政府早前宣佈，成立100億元防疫抗疫基金，協助紓困，黃翊表示：「如果啲措施可以幫助我哋呢類小企業共渡時艱當然最好，上次誠哥（李嘉誠）搞嘅基金我哋大牌檔係申請唔到，因為租用緊政府場地，希望今次幫到手啦。」
黃翊心痛看到市民為口罩等物品要通宵排隊：「大家搶口罩、廁紙同消毒用品，連樽仔都搶晒，見到啲公公婆婆要排隊輪口罩就覺得淒涼，雖然病菌唔可以睇小，但大家真係有啲恐慌性去搶購，咁唔係一件好事。」他又希望政府高官們可以真正聽到小市民的訴求，他說：「希望佢哋嘅反應快啲，做番啲嘢等大家安心啲，淨係講呢個疫情，大家都已經聽到好多民怨。」
事實上冰室開業1年間先後遇上社運和疫情，黃翊稱雖然生意較預期差，但仍對整體前景樂觀，雖然連演藝工作亦接近停擺，他說：「講開真係一殼眼淚，出返嚟唱歌3年，最近1年慢慢多啲工作嘅時候就嚟呢個疫情，所有商演、登台全部取消晒，即使社會運動嗰段時間都冇停得咁多，惟有乖乖地唔好亂使錢，專心留喺度睇檔啦。」
採訪：曹家誠
攝影：沈健程、陳俊強
攝影：沈健程、陳俊強
（攝影：沈健程、陳俊強）
黃翊稱雖然生意較預期差，但仍對整體前景樂觀。
黃翊心痛看到市民為口罩等物品要通宵排隊。
黃翊稱已要求冰室所有員工提高衞生意識。
他又表示冰室每日要營運，對口罩和清潔用品的消耗亦不少。
黃翊稱大牌檔所在的政府場地，早前開始為期半年的翻新維修，連帶大牌檔亦跟隨停業。