偉易達噚日將佢本年報擺咗上網，蘭西發現，偉易達最高薪嗰位仁兄，舊年人工加咗四成七，年薪去到兩千五百萬，斷估呢個高薪人士應該係主席黃子欣。蘭西粗略計過，單係呢份糧，應該可以買到一個千多呎嘅名門，當然，黃生唔使住呢類所謂豪宅。
加薪幅度差唔多有近五成，大大超過一般人，但係偉易達舊年盈利大升兩成三，令到好多估佢業績倒退嘅分析員，跌到一地都係眼鏡碎，蘭西覺得加薪四成七，都算可以接受，唔係好似其他公司咁，冇乜錢賺，啲董事重攞鬼咁多人工。
更何況，偉易達公布業績之後，第二日股價升近四成，由十一個兩毫半升到十五個六，昨日更加升到十八蚊，小股東開心到喊，大股東加多少人工，冇所謂啦。
其實黃老闆除咗年薪二千幾萬，偉易達派末期息，每股差不多九毫四，揸住九千幾萬股嘅黃子欣，收成八千六百萬股息。加埋份人工，一年收入有一億一。
電郵地址：[email protected]