【李八方online】李嘉誠推廣電競 設擂台畀玩家切磋
李嘉誠基金會李八方電競
HKEsports有份合辦「香港競XP」活動,仲幫誠哥設計咗張圖做招徠。(HKEsports facebook圖片)
電子競技已經成為新世代嘅文化,李嘉誠基金會都好鬼跟得上潮流噃,話要藉住回歸20周年,贊助「香港競XP」活動,除咗會推介Nomadic實境虛擬體驗,仲同3香港及Razer合作,喺6月29日至7月9日於黄埔新天地時尚坊,開壇設下「電競打擂台」。
屆時美國公司Nomadic VR會提供實境虛擬科技及場景設定,係香港引入嘅首個走動式、虛實場景結合體驗,等大家置身其中,感受前所未有迫真感,市民係免費試玩。同場亦會擺擂台推廣電競,邀請世界知名電競好手來港同香港玩家切磋,仲會開放平台畀港青參與《英雄聯盟LOL》、《FIFA17》、《街頭霸王》、《部落衝突:皇室戰爭》等熱門電玩遊戲,中外較勁一番。
原來呢個活動係想話畀大家聽,「打機唔係等於廢青」,去年數據已經顯示,全球電競產業市場規模為4.6億美元,估計2019年會去到11億美元,合作機構HKEsports都已經喺Facebook宣傳活動,希望畀更多市民認識電競,出po嘅hashtag包括「#打機有錢途」、「#誠哥好野」。
據知6月29日舉行嘅啟動禮,仲有電競界四大天王丁特、達哥、RZR Xian同TMD Aaron坐鎮捧場。八方最期待嘅其實係超人登場做電競友,即場露兩手。
日期:6月29日至7月9日
地點:黄埔新天地時尚坊
活動:實境虛擬+電競擂台