噚晚史篤城對紐卡素嘅比賽中，高治頂入全場唯一入球，幫史篤城贏波。呢位長人前鋒幾年前嗰隻機械人舞跳到出晒名，仲試過喺威廉王子面前獻技㖭！事隔幾年，高治噚晚建功之後冇再跳機械人舞，但係都跳咗隻鴨仔舞。

呢隻舞引起咗好多外國球迷嘅迴響，好多人都話自己有跳開呢隻舞，高治係抄佢哋，仲有人想問高治收返版權費㖭。賽後高治話：「我有個朋友係東北人，呢個係佢嘅招牌動作，個慶祝動作係送畀佢嘅。」對住東北球隊紐卡素入波，做呢個東北人嘅動作，會唔會激嬲人㗎？除咗一個二個都話高治抄佢哋之外，仲有唔少人話呢隻唔係鴨舞，係蟹舞。睇真啲，又真係幾似蟹喎！