周日英超簡直係默西賽德雙雄嘅災難日，愛華頓喺主場2:5慘敗畀阿仙奴之後，到利物浦作客熱刺又係輸得大大鑊，紅軍防線繼續有「水準演出」，1:4輸波。洛夫雲繼續搶鏡做最大罪人，其他後防球員都唔好得去邊。紅軍喺今場到達一個唔多想去嘅里程碑，成為歷來第六支喺英超失球到達1,000大關嘅球隊。咁啱呢個紀錄嘅保持者，就係熱刺。

哈利卡尼喺開波四分鐘就先開紀錄，呢個失球集合晒紅軍守將各自嘅問題，祖高美斯包越位、洛夫雲輕易被傳球笠過走甩埋卡尼、門將米洛列特出迎唔準、祖爾麥迪比包抄不力，造就熱刺入波。呢一球亦係英超自92年成立以嚟，紅軍喺呢個賽事累積失第1,000球。

到10分鐘紅軍失第二球更難睇，熱刺門將洛里斯開生波，洛夫雲喺半場頂漏，卡尼見咁筍長驅直進助攻畀孫興民建功。利物浦喺24分鐘由穆罕默德沙拿追返粒之後，領隊高路普果斷將洛夫雲換走，由阿歷士張伯倫入替，形勢一度有改善，但臨完半場又輸多球，洩晒氣之後，紅軍喺下半場再冇反撲能力，56分鐘卡尼再入一球奠勝。

上季利物浦遇Big6對手龍咁威，到今季走晒樣，季初頭威頭勢4:0贏過阿仙奴，但之後一沉不起，悶和曼聯加上先後慘敗畀曼城同熱刺，呢三場波得一分一共失九球。紅軍防線救極都冇改善，今季踢咗九場聯賽已經失咗16球，係53年嚟喺頂級聯賽同期失波最多嘅一季，高路普賽後都灰晒，話家都唔使講甚麼爭冠同前四︰「今日我哋唔使講前四，家我哋排第九，我簡直無法置信，但家我哋確係應該喺所處嘅位置。」
熱刺呢排勢頭咁勁，全取三分之後已經追到同曼聯同得20分，熱曼會喺周六英超早場就交鋒，肯定好睇。

英超歷來累積失球紀錄
排名　球隊　失球
1　熱刺
1237球
2　愛華頓　1225球
3　阿士東維拉　1186球
4　韋斯咸　1163球
5　紐卡素　1148球
6　利物浦　1003球