全球資產值最大、市場第3大嘅銀行集團獅子行，網民對佢真係又愛又恨，點解咁講？早輪《香港討論區》搞咗個「十大最差銀行服務」選舉，被網民投票一舉當選嘅獅子行，都好尊重言論自由，冇嬲啲網民。《香港討論區》今期就再接再厲，搞「大家最想打工嘅銀號」，結果又係滙豐掄元。

大行背景夠醒神

截止噚日統計，被網友用「滙鬆」做代號嘅獅子行，喺芸芸銀行中，得票率一馬當先，共得13票，得票率為48.15%，次名則相信係指花旗銀行嘅「花肥」，以及「恒真」（恒生），各獲4票，得票率14.81%，跟住係「東化」（東亞），獲3票，得票率11.11%。
有網友居然話：「恒真」嘅工作壓力好大，都係揀滙豐或者中銀好啲。唉，所有熟悉獅子行嘅行內行外人士，睇怕都唔會認同呢位網友嘅觀點，喺滙豐做嘢嘅工作壓力，點會少得過其他銀行，皆因獅子仝人都知，呢個集團嘅服務對象排名，第1係股東，第2係顧客，第3先輪到員工。
之不過，點解咁多人想入滙豐做呢？梗係唔關工作壓力低啦！無他，人哋係國際大行，企業文化又專業又穩妥，網絡遍布全球，市場佔有率又掂，行出嚟話喺獅子行做，畀人嘅感覺都醒神啲啦。