《衝上雲霄II》「Cool魔」張智霖雖然人氣爆燈，但未能為佢奪得視帝，只能獲頒「最受歡迎電視男角色」，佢難免有啲谷氣，領獎時忍唔住話：「咁係咪代表TVB唔鍾意我呢？點解全民投票我先攞到嘅？其實我想講，即係親生仔固然係可愛，但有一種仔女都係好可愛，當你需要佢嘅時候會及時出現，呢啲叫義氣仔女。」咁坦白，令人為之愕然。

原來噚晚張智霖出席完頒獎禮之後，跟住接受《東張西望》訪問，同Sam哥吳鎮宇及一眾得獎者接受訪問，但奇在之後張智霖未有再返後台影得獎者大合照，亦未有接受傳媒訪問。咁佢去咗邊呢？原來因為佢知道成班粉絲喺電視城門外冒雨頂冷等佢一齊切蛋糕同開香檳，所以張智霖決定趕住出咗去外面見守候咗佢成晚嘅fans。