「冇乜出奇，就快國慶啦嘛」，識途老馬的蒲精朋友淡淡然地說。
「國慶關咩事呀？」
「蒲慣大陸嘅人都知，每逢大時大節政府就會做嘢，黃、賭、毒一律嚴打，但各單位基本上都會自動自覺，唔使查牌都懂得收斂。尤其係熱愛北上尋歡嘅朋友，明知呢排到處乾乾淨淨，所以好多寧願喺屋企瞓多陣好過。香港算係初歸新抱，可能未熟架步，所以特區政府要做多啲門面工夫，務求大家慢慢熟習。」
又係聽君一席話，勝讀十年書，唔蒲唔知天下事。
「但係我未遇過香港查牌，應該點算？」蒲精反問。
「盡量合作，基本上差人係例行做嘢，靜靜地準備身份證，查完後便相安無事。」
「咁如果喺桑拿揼骨遇到查牌點算？」
「通常唔會查客，但如果撞正要查，最多咪去locker攞囉。」
「咁咪好麻煩？」
「咁你下次咪試吓將張身份證『攝』喺個蘿柚，遇到查牌咁你就威晒，唔使行出行入。」