日本女子組合乃木坂46主將白石麻衣今年人氣爆燈，從2月起上架嘅性感寫真集《Passport》，至今於當地仍長賣長有，出貨量已達25萬本，成為本年度Oricon書本銷量榜最暢銷寫真集，累積銷量逾22.8萬本，仲創下Oricon書本銷量榜由2008年開始以來最高銷售紀錄，登上本世紀最暢銷寫真集。

25歲嘅白石麻衣成為新一代少男殺手，今日佢出席Oricon舉行之頒獎禮接受殊榮，白石麻衣自言好驚訝可以獲頒呢個完美殊榮，白石麻衣談起連天王級福山雅治都係「知音人」，早前在音樂節目《Music Station》上踫頭，福山雅治竟帶埋《Passport》向白石麻衣索簽名，仲大讚：「好不得了嘅寫真集呢！」令白石對自己作品感到相當自豪。

今年最高銷量寫真集，乃木坂19歲成員齋藤飛鳥嘅《潮騷》（12.67萬本）排年度銷量亞軍，而女星石原聰美嘅《encourage》（11.57萬本）就排季軍。至於男星竹內涼真嘅寫真集《1mm》就賣出6.2萬本成為男星之冠。

更多娛聞，喺晒《娛果》
http://fb.com/appledailyent