何韻詩喺科學園搞嘅《On The Pulse Of 我們正在》音樂節，噚晚圓滿結束，好友林二汶到來支持。阿詩喺演唱會中段繼續大派熊公仔，佢話：「聖誕節我送咗25隻，今日尾場加Boxing day，我決定加碼送多幾隻。」為咗籌辦今次演唱會、音樂節加市集，搞到佢過度疲勞，喺一個月前更仲面臨失聲邊緣。

講到呢個騷面對各種問題，阿詩好感觸話：「仲有5日就新一年，希望大家喺嚟緊一年可以成為更自在嘅自己，人面對好多難關，有啲係外在，有啲好無助，雖然係唔如意，但我相信每個困難都係契機，有機會變得更好嘅自己。」之後阿詩唱咗故友盧凱彤嘅《代你白頭》。最後喺Encore環節，阿詩一出場就話：「事不宜遲，雖然我哋有噪音管制，唔好理佢。」唱到《勞斯萊斯》嘅時候，阿詩兩度忘記歌詞，佢有啲尷尬話：「多謝！Thank You！」，最後以《千千萬萬個我》結束。

阿詩喺騷後接受訪問，佢話好彩唱歌老師教咗一啲技巧用聲，完騷後終於可以真正休息，佢仲話：「呢幾日見到好多一家大細行市集，聽講有啲攤位每日賺到兩萬，所以喺o依家嘅環境，做歌手唔可以循規蹈矩，我希望可以跳出框框，大家一齊賺。」

後來又問到閃靈樂團隊因為欠缺「香港境內不存在技能」而唔可以嚟香港演出(新聞連結： https://bit.ly/2Lx4H1x )，會唔會覺得美中不足？ 阿詩笑笑口話：「噚晚(前晚)佢哋嚟咗喇，連個天都幫佢哋，本來電腦死機，點知最後透過手機都可以做到，證明只要唔好放棄就可以成事！」

至於下次會唔會搵啲有「特異功能」嘅單位演出，容易得到工作簽證？阿詩笑住話：「我自己開始練習， 到時將內功過畀其他人。」呢個月30日係師傅梅艷芳逝世十五周年，阿詩話冇特別嘅紀念活動：「其實唔單止一天去上支香，最重要係將師傅做人態度同精神放喺工作上，時間真係很快，托賴喺呢15年我都盡力做好自己，希望冇失禮佢。」

精選娛聞，喺晒《娛果》
http://fb.com/appledailyent