今年38歲嘅《東張西望》主持李潤庭，本來已經冇乜嘢做，上年被爆背空姐老婆Crystal偷嗒人妻Tiffany後，工作仲全面暫停，為咗呢個第三者，唔單止形象插水，仲賠上事業，被封賤男。
雖然大台安排李潤庭開記者會交代事件同道歉，但依然掟佢入雪櫃「過冷河」，到今年4月，先至俾佢解凍，但都唔俾佢返主播台，要佢喺出面跑外景，直至上個月先俾佢坐番出嚟，佢5月生日嗰陣仲話同太太進展良好，希望用時間去補救，𠱁番太太，點知噚日有周刊報道，話佢同Tiffany仲有聯繫，仲影到佢哋前後腳返灣仔一間劏房，同李潤庭話會結束關係，完全係兩回事，亦證明佢死性不改。

買外賣周圍望

報道話李潤庭𠵱家租住灣仔百幾呎嘅劏房，當日佢同Tiffany前後腳返去，各自攞鎖匙開門，而Tiffany上樓前就先去買外賣，其間都有周圍望，好似擔心行蹤被發現。報道又話雖然李潤庭復工，不過工作量唔算好多，有時會去做gym，或者去公園睇人捉棋打發時間，身邊啲朋友都不值佢嘅行為，已經都唔再約佢，噚日《蘋果》曾經聯絡李潤庭，不過佢未有回覆。
撰文：馮仁昭