本港中學生入大學，話難唔難，話易唔易，睇見每年會考生四出奔跑，為求一個中六預科學位，連累家長通宵排隊，就會覺得學生想入大學，幾咁艱難。但係，八間大學每年都搞開放日，吸引中六學生參觀，唔少學系要搵名人校友上鏡（影帶），公開稱讚大學及本學系，希望中六學生選讀，你又會覺得入大學好易噃，否則大學花錢花時間嚟宣傳，貪得意乎？
中文大學收生成績非常好，全港高考成績最好嘅前一千名學生之中，五百餘人入咗中大，讀環球商業系嘅，成績最標青，平均有四點二五分（Ａ五分，Ｅ一分）；相反，入「自動工程」嘅，只需一點七五分，可見香港學生重商輕工，中學叻女叻仔讀理科，入到大學就棄理工科而去，夠晒現實。

讀法律又點？港大法律系唔憂冇人讀，中大明年開辦法律學院，招收第一批法律系學生，名額五十名，要加入競爭，聽日（九月二十四日）中大搞法律學院入學資訊日，九點開始，上午十一點喺中國文化研究所內會辦一個「模擬審訊」，畀家長、學生實景領略法庭審案，有現實生活嘅法官扮法官，原告、被告、證人、雙方辯護律師，齊齊出庭，除法官判決外，參觀人士亦可投票表達佢哋意見：被告是否有罪？
左丁山問教授Ｍ：「想有人聽審，案情最好曲折離奇喎？」教授Ｍ話：「件案係謀殺案，案情根據案件改寫，背景變動晒，一定逼真，你睇完都或者想做律師。」做律師就要讀法律系，攞番個LLB先。收生有乜標準呢？據講第一個條件係中英文良好，英文要有一個會考英文Ｃ級（課程乙）打底，其他成績要求，仍待斟酌。英語係法律界國際語言，退休大狀余叔韶話過，英文唔好，不會領略法律精義，尤其是香港屬英語不成文法系統，英文唔得嘅律師，你要咯。中大擁有全世界最多最齊嘅中國法律書刊收藏，中文唔掂，有如入寶山空手回，故此中英兼優嘅學生，讀中大法律系十分適宜。