葉童和貝安琪噚晚喺圓方出席意大利電影週揭幕禮，開幕電影《Dogman》男主角馬些路方堤，及另一部電影《情迷拿坡里》導演法贊奧斯帕特專誠嚟香港參與活動，一眾嘉賓喺台上大合照時，兩位毫無架子坐喺台前梯級上。

去年2月未婚生子嘅貝安琪，今個月初同細4個月嘅加拿大籍男友Simon van Damme入紙註冊（新聞連結︰ https://bit.ly/2NbE0U9），依家佢體態fit爆，回復未生BB嘅身材，佢曾經喺意大利拍過幾套電影，喜歡當地藝術氣息，講到電影中女演員都非常性感，佢話：「之前都有做過性感角色，依家做咗媽媽都可以Sexy，但太性感就唔得，唔想囝囝唔開心，反而老公會鍾意咁Sexy。」

貝安琪媽媽劉香萍日前被蕭定一嘅娛樂公司，入稟高等法院追討100萬人民幣，貝安琪話：「No,Really?I don’t know.」並表示唔知道媽媽公司合約糾紛問題，仲話：「依家我好少同佢一齊做嘢，我簽咗模特兒公司，家庭聚會先一齊，佢抱孫都好開心。」

葉童近年都應邀支持活動，佢有感意大利電影同香港電影唔同，會描述人物角色更深入，已經第三年來偷師學嘢，佢話：「佢哋唔會針對票房，希望拍到啲藝術片、人性化電影，雖然語言上會有隔膜，但每次都睇得好開心，入面啲女仔都係有血有肉，每次睇完對女性電影仍然充滿希望。」

早前葉童完成舞台劇演出，她對現場演出好感興趣，重提遇到蝦碌事，佢話：「條裙不停勾住張櫈，第一次好驚，惟有甩開張櫈，好彩我個角色係有妄想症，啲動作觀眾都好接受，最後一場又勾住咗，我就係咁打張櫈，出到嚟效果都好好。」做完舞台劇之後葉童希望做幕後工作，想做導演去學校教學生做戲，有機會去深造。

精選娛聞，喺晒《娛果》
http://fb.com/appledailyent