亞視出糧進展緩慢，藝人四圍找秘撈撲水。「六合彩之子」蔡國威曾訴苦開支掹掹緊，有意用六位數字積蓄創業博一鋪，他早有構思與友人合股近百萬經營寵物酒店，還會提供一條龍接送、食宿、美容及賣寵物用品服務，威仔前日趁得閒，便帶着愛犬Babylon到九龍城睇舖，着手籌備一切，希望年中可以開張。

揀市區貪方便

女地產經紀帶威仔到附近啟德道看兩間地舖，兩舖均面積約千呎，租金約三萬多，間格各有不同。威仔先看一間內有不少柱位，另一間則有開陽天井，威仔說：「兩間各有各好，多柱嗰間方便我間房，另一間就有露天後欄，我可以設計花園同泳池，畀狗狗多啲走動空間，兩間我都滿意，最鍾意佢個地段喺巿區好方便，面積又夠大可以收留多啲貓狗，呢幾日要同股東傾吓盡快決定。」
威仔表示時下主人視寵物如子女，往往因擔心愛寵而謝絕外遊，他堅持寵物酒店要提供妥貼服務：「我諗住將來開舖，親自過嚟留宿照顧啲寶貝，我囡囡Babylon到時會喺舖做PR，負責招呼所有朋友仔。」
採訪：比華利
攝影：陳慧安