入境處個優才計劃早前批咗啲內地優才嚟香港定居，包括兩位鋼琴王子李雲廸同郎朗。不過，之後就有批評聲音話，呢啲世界級優才成日周圍飛，根本好少嚟香港，對香港好似冇乜實際貢獻。李雲廸噚日就用行動反駁呢啲批評，佢以「到訪院士」嘅身份，去演藝學院主持首場大師班，即場教導張緯晴同周航呢兩位本土年輕鋼琴家。
李雲廸仲承諾，未來一年會搞多三至四次大師班，教導學院嘅鋼琴學生。攞咗智能身份證大約半年嘅李雲廸話，最大感受係入境過關時每次都唔使排隊。現場有記者叫佢拎張身份證出嚟睇吓，點知佢竟然話冇帶，睇嚟王子仲未熟悉香港規矩，唔帶身份證，差人隨時帶你返差館㗎。