喺上個月約滿無綫離巢外闖嘅咪神陳潔玲(Christy) ，講到呢個月嘅自由身生活，Christy話：「其實呢件事已經醞釀咗好耐，我都有同好多朋友傾過，佢哋俾咗好意見我，諗深一層，我覺得呢個都係啱時候，如果過多幾年先去決定離開，我擔心會同社會脫軌！」佢又話：「喺呢個月我覺得好好玩，接觸咗好多其他嘢，可能以前喺大公司乜都有人安排好，0依家樣樣都要靠自己，所以覺得挑戰性好大！」

0依家除咗繼續做演員之外，仲同朋友夾份開咗一間一站式婚紗舖，又會試吓做KOL，實行多元化發展：「可能我係天秤嘅人，要求啲靚同完美嘅嘢，我相信冇嘢比得上結婚，話晒呢啲嘢一世人一次，梗係要做到最好最靚，所以我咪同朋友合作。」Christy話基本上由裝修到做生意，每一樣嘢都會親力親為：「做藝人真係訓練到EQ，拍戲有乜嘢未見過，以前我個人好自我，但係經歷多咗，做嘢淡定好多，對做生意有幫助！」

Christy亦都話：「以前喺公司見到啲高層，佢哋叫我俾心機加油，但係已經好努力好俾心機，做藝人好被動，有時覺得有無力感，反而做生意可以自己控制到，所以咪俾自己條路，如果追求唔到理想，仲有可以做！」不過就有好無力感，佢話冇後悔過入行：「再揀都會入行，喺呢幾年得著好多，令到我急速成長，世界亦變得大咗好多，我唔會後悔 好值得，惟一係覺得演戲上有啲角色做唔到，好似係拍古裝，學唔到講對白啲速度，我擔心將來要拍自己唔夠貨，如果試多啲吸收多啲，走嗰吓會有信心，不過冇辦法，惟有邊做邊學！」

化妝：Pasu Choi
場地提供： Alas de Angel
三圍數字：33C 23 34