混血名模Rosemary同名模琦琦今日都有嚟到鄧達智嘅婚禮，佢表示同鄧達智係相識多年嘅好朋友，自己第一個騷都係對方嘅騷，佢話：「有好多回憶，大家一齊去過好多唔同嘅地方，拍攝過好多佢嘅作品。」而Rosemary今晚一襲黑色露背晚裝亦係鄧達智設計嘅作品之一。

問到Rosemary今日點解老公冇一齊嚟？佢就表示：「老公今日唔喺香港，所以冇辦法嚟恭賀一對新人，明日返一返嚟就又要飛喇。」老公咁忙你哋咪冇時間造人？Rosemary就笑言：「賺多啲錢先啦，喺香港唔平㗎，老公都想生，希望有一日有Good News俾大家。」

至於琦琦就揀咗送上利是，仲好有心思專登搵咗兩個男人嘅利是封。琦琦話今日係第一次見到陳醫生，有冇俾佢哋sweet感染？佢話：「應該咁講，佢哋好勇敢，呢個愛需要一份勇氣。」琦琦噚日仲專登等到12點send message祝福，想第一個祝福佢哋永遠幸福。琦琦話呢個係一個承諾，希望兩人永遠包容對方，永遠相愛。