花旗嗰邊越嚟越唔掂，已經唔係憂慮，係擺在眼前嘅事實，雖然就嚟任期屆滿，布殊為人為己都要做番啲嘢，於是乎話要推出救市方案，咁大場戲，梗係要搵人抬轎，最有份量嘅就係伯南克，但伯南克好精，明知布殊淨係想減稅，咁樣對赤字同美元好有問題，所以佢只係表態或支持一籃子措施嘅救市方案，仲提醒布殊，做乜嘢都要睇住盤數，唔好搞到啲赤字變晒樣。
伯南克前晚嘅講話仲有提到經濟前景同減息，聽完之後，好多人轉睇佢會減息0.75厘至1.25厘，唔係全年喎，係下次減息，有冇咁誇？好快就知，不過，從佢嘅說話睇嚟，花旗真係好唔掂。

大市料可再升一段

不過，炒股票又唔使諗咁多，只需要知道炒落嘅時候乜嘢都係壞消息，炒上嘅時候乜嘢壞消息都唔使理，花旗股市前晚跌咁多，靠近12000點，隨時會有反彈，踏入下禮拜，應該係炒減息嘅時候嘞。
港股昨日都幾威，好友頂到實，恒指最後升86點，下禮拜一有機會升多啲，要留意乜嘢股份，可以昅實內銀股，主力股份係工商銀行（1398），昨日先行掃上，升5.4巴仙。
招行C輪5894：招商銀行（3968）都唔錯，升1.9巴仙，報收30.90元，反彈睇34元，可以吼招行C輪5894，昨收50仙，槓桿率6.2倍（有效3.7倍），對冲值0.6，正股升上34元，5894應該喺90仙樓上，正股跌穿29元止蝕。
俊樺