【第一次簽經理人】以前唔識拒絕人 Rosemary:公司會幫我
中秋RosemaryAna R伍靜麗
名模Rosemary最近加盟Ana R.旗下model one公司,噚晚佢哋就同伍靜麗(Angie)喺中環一齊出席髮型用品品牌Amika開幕活動,性感現身嘅Rosemary,第一次簽經理人,佢話好開心,因為大家嘅理念好接近:「我好忙,有唔同嘅活動,公司會幫我揀啲健康嘅工作,之前有活動自己唔想去,但又唔識拒絕人,o依家有經理人可以幫我友善地拒絕。」Rosemary話o依家好注重健康,又係瑜伽教練,佢笑言變咗公司模特兒朋友嘅健康顧問,佢都好樂意畀唔同意見,發放正能量。
講到老公Jason,Rosemary就超興奮咁話:「佢返咗嚟香港,yeah!我哋已經兩個月冇見,佢做嘢好辛苦,10月我哋會素食月,到時會好乾淨。」Rosemary剛加入咗大家庭,身為大師姐嘅Ana都話興奮,講到Rosemary係3個中最性感,佢哋就笑指各有不同性感,Ana就指住自己嘅露腰裙話:「我係媽咪嘅性感、Rosemary就係個性嘅性感、而Angie內裏係bra top,係超模嘅性感,3個都有唔同嘅性感。」講完大家都哈哈大笑。而Ana老公就離開咗香港公幹一星期,佢話老公打番嚟只掛住問個女嘅嘢,個女Maya又成日搵爸爸,搞到佢好妒忌!。
另外,Angie中秋節畀男友撇低,自己留喺香港過,男友就去夏威夷玩,佢話:「因為我做唔切個visa,剩返我一個人過,我都好想去夏威夷呀。」
伍靜麗(Angie)、Ana R.、Rosemary