無綫小生花旦逃亡潮一直未停過，皆因電視台工廠式運作令到唔少藝員吃不消，苦盡甘來亦冇幾多個，好多人都係有苦自己知，嗱！洪天明就係其中一個喇。

洪天明係「七小福」洪金寶個仔，話哂都係星二代，老豆識咁多人，已經打好基礎，加上天明都好捱得，跟住曾志偉喺電視台，理應係受到禮遇。但係天明喺電視城21年，仍然俾人投閒置散，今個月15號連老婆都約滿，所以兩公婆都十五、十六，一方面做咗咁耐，怕俾人話唔飲水思源，另一方面，話哂志偉睇住佢咁耐，志偉一日喺大台，佢都總要向老人家有個交待，o依家仲做咗爸爸，個人成熟咗，一定要思前想後。

天明同老婆約滿，死都唔肯簽藝員約，大台最近咪游說佢哋續約部頭，日前天明一家四口於九龍塘為「SDM十周年紀念特刊」拍攝，被問到約滿一事，佢話：「當然喺大陸發展比香港好，點解繼續喺TVB？因為1年裏面都希望有幾個月喺香港做嘢，陪吓屋企人，入咗TVB 21年，再落去合作都冇好嘅位置，都唔想繼續，因為都拖咗好多年，我只係想有演出機會，唔會要求好多，一年要一部之嘛，呢啲係要互相付出，冇得迫，可能未去到呢個價值。」

一年一部，即係可有可無，純粹係想綁死佢，等佢無機會同其他香港電視台合作，不過為咗個家，就幾咁意興闌珊，最終都係就範：「都習慣咗，呢一行係咁被動，要睇機會，天時地利，o依家努力做好自己。」天明都好寸話大台咁多年冇俾機會佢，連一年一部劇嘅機會都冇，所以佢都慶幸自己係大陸闖出新天地，開製作公司，做幕前，未來佢仲話會開餐廳同做時裝生意，為咗家庭奮鬥。

至於老婆喺大台跟天明都係同等待遇，佢喺呢個月15日都約滿大台，為咗照顧兩個仔，本來唔想再續約：「今個月15號就滿約，已經諗住唔再續，但佢哋唔俾我走，話keep住關係，走咗又好似會得罪佢哋咁，所以就只係簽藝員約。不過o依家大部份時間都係以小朋友為主。」想走走唔到，同老公一樣被投閒置散，所以佢生完一個又一個，最近仲有意生多個女，連老爺洪金寶都舉腳贊成，不停催生，天明話：「爺爺好想要女，因為佢覺得女會顧家，從第一個到第2個都已經叫我追！一切都睇太太啦！」