由「男神」王宗堯及李佳芯男友陳炳銓（Danny）主演嘅ViuTV 20集電視劇《賤民20》，前晚喺沙田石門戶外取景，前晚拍攝二人分別着住高衩底褲喺街上跑步並巧遇，雖然附近環境偏僻，但仍有部份巿民會路過，王宗堯同Danny雖然把口話唔會尷尬，但係一有人經過，都即刻着番件浴袍遮掩，以免被報以奇怪眼光。

王宗堯前年拍攝電影《壹獄壹世界：高登闊少踎監日記》時，已經試過全裸露股跑街，今次有得着底褲，對佢嚟講自然冇難度，劇情講佢有個怪癖——鍾意就咁着住條底褲跑步；而Danny就因為同朋友賭氣而着底褲跑街，二人穿上同一款式底褲而街頭相遇，兩人更即場構思加插動作，喺相遇時一齊搲屁股。

喺來回多次拍攝，自稱未有打底及做任何安全措施嘅宗堯，似乎進入些微反應狀態，但並非維持太久，大都以平靜狀態拍攝。王宗堯話：「噚晚都拍完跑山，多蚊到好得人驚，成身都好痕。噚晚拍之前都好驚，有一班航拍發燒友玩航拍，好在落雨佢哋啲機唔濕得水，之後佢哋走晒我哋就拍。」王宗堯又笑指平時自己着開平腳底褲，但前晚要佢着高衩式，感覺比較危險，對於Danny着兩條底褲打底，王宗堯話：「佢有啲似着咗尿片，我就唔得，不過拍時要跑要跳，都幾危險。」

《賤民20》講述3個去到人生終極低潮嘅人，其中王宗堯飾演嘅角色憑住投資炒賣而身家變得豐厚，及後大起大落至負資產，又搶咗阿媽間公屋住，仲推阿媽住老人院，感情生活混亂等，王宗堯指其角色好賤。由於角色係金融業，所以唔使刻意操練大隻。

自稱角色卑賤、被人玩嘅Danny，喺劇中向同事誇口話淨喺着條底褲出街買豬脷，問到佢拍攝呢場露肉戲有冇同女友李佳芯商量？Danny話：「我有同身邊嘅朋友講，佢話好，睇吓點！」再問佢女友有冇畀意見？Danny講有味笑話：「佢擔心我做開舞台劇，我乜都偏大，我頭又大、眼又大，乜都大，佢教我收番細啲，唔好咁大！」至於女友有冇教佢做安全措施？Danny話：「我私下打孖底，因為唔知條底褲有幾厚。」