林奕匡、JW、Supper Moment今晚喺旺角麥花臣場館開騷，SM話之前喺呢度開過音樂會，覺得呢個場好特別，好好玩，香港地方唔夠大，搞騷場夠多，香港藝人會遇到場地問題，唔同場地觀眾氣氛唔同，其實最緊要係講氣氛。

講到佢地申請大場地唔係一次就批，SM話：「唔可以用慘來形容，始終香港地方係好細，冇咁空間，想搞大型騷，要申請試幾次，暫時未批，努力緊，不斷咁試，開騷計劃有幾個方案，有幾首準備。」但係有歌手一次得喎？佢哋話：「睇彩數其中一個因素，我哋申請期，有其他歌手入紙，或者做活動撞期，不過，我哋係出專輯先，先決定個騷點搞，到時先決定。」

JW就話男友唔會來，講到G.E.M.今晚紅館開騷，之前有傳佢哋不和，問JW會唔會去睇騷，佢就斬釘截鐵話：「冇可能喇！我今晚都要做騷。」之後佢又解釋：「不和係你哋講，大家要做騷。」咁之後會唔會睇？佢又話：「之後都要做嘢。」咁係咪幾場都唔可以棒場？咁有冇送花籃先？佢話：「因為要做嘢囉！希望佢GOOD SHOW，送花藍果籃會同同事一齊搞，通常歌手藝人做騷都會做呢樣野。」之後JW都話自己之後音樂會要準備操fit自己，咁會唔會迫男友一齊減肥，佢話：「唔會迫，我哋食嘢都好健康。」