張敬軒同羅力威晏晝去到旺角街頭出席服裝品牌活動，喺活動上要佢哋兩個即場為外套釘上裝飾同襟章，然後將完成品送畀佢哋覺得好重要嘅人，軒仔就喺外套上釘上「N Y」，話送畀即將退休嘅吳雨。

到羅力威整衫嘅時候，一嚟就畀釘襟章嘅大頭針拮到手指流血，旁邊嘅軒仔唯有出手幫佢完成件外套嘅佈置，仲笑話：「我唔方便幫你啜。」結果羅力威揀咗釘「Y A N」，佢話係送畀生日嘅助手喎。

講到吳雨退休，軒仔話：「係吳雨大哥傾我入嚟（英皇），幫我嘅事業升到另一個高峰，所以對佢嘅離開好唔捨得，但又好明白佢想過安逸嘅日子。」軒仔又話難忘吳雨經常教佢要事事顧全大局，尊重自己嘅事業，咁有冇畀大哥鬧過？佢話：「咁又冇。」

至於羅力威就直認曾經好多次畀吳雨「照肺」，咁係因咩事呢？佢話：「都係喺頒獎禮上面言行唔好，太多抱怨。」有冇因為你拍拖而鬧你？羅力威話：「咁又冇，飯都一齊食過幾次啦。」即係帶過女友雨僑見家長嗱？佢話：「幾家人都見過啦。」