自言裸露冇底線嘅袁嘉敏(Candy)，完成晒成個《豪情3D》嘅工作之後，唞咗冇幾耐又開始新一輪工作喇！佢先兩日喺微博share新相，話：「開始拍攝新電影。」係咩戲呢？Candy就死都唔肯講，不過就應該係《殺破狼2》拍外景，在場有好多工作人員，肯定有好多動作場面啦，因為佢之後幾個新post都係share佢嘅「戰績」----又腫又瘀嘅手手腳腳！

Candy接受訪問時話:「拍動作場面真係四肢都好多瘀傷。」見到佢小腿瘀咗好多地方，仲有擦傷添，不過入得最嚴重係佢嘅右前臂，佢話：「套戲很用心拍，用真力，幸好另一位演員非常專業，每個take打返中同一個位，瘀的範圍不太大，但暫時我仍未夠膽搽嘢捽佢，等夜啲佢減咗啲腫脹先。」嘩，睇相超恐怖，唔講齋睇相嘅話，以為佢發生家庭暴力咁...

今日就再喺微博post佢隻手嘅傷勢，睇嚟佢最後都搵藥酒捽咗，因為啲瘀血發晒出嚟，關心吓佢，問佢有冇睇醫生？佢話：「都要睇，不過因為套戲啱啱開始拍，個個演員都好俾心機，用盡心機去拍，其實今次好難得，喺呢類男人戲入面都加個女角色俾我，所以要我打都唔介意。」

網民fans都留言希望Candy早日康服，不過都係手腳瘀啫，不過Candy都要小心，唔好打到個連心口都有內傷呀！