當年今日
關於我們

【引渡惡法】德國港人工程師憂修例後中門大開 剪特區護照避「送中」

蘋果日報 2019/06/07 00:08

立法會逃犯條例移交逃犯引渡惡法

如箭在弦的惡法修訂,或掀起本港新一輪移民潮。有港人工程師居德10年,一直未有辦理正式移民。隨着港府強推修例,打開「送中」大門,他說,擔心會成為銅鑼灣書店桂民海翻版,「你係要剪咗香港本護照,再拎外國護照先係真正護身符」。他續指,10年前被德國妻子問香港會否成為中國另一個城市,「當時同佢講邊有可能啊?有一國兩制。而家諗返咁講,係何其天真」。
石賈墨是Facebook羣組「香港人在德國」的版主,修讀工程系的他於2009年讀大學時與來自德國的太太相遇後,便轉往德國讀書和發展。現時任職工程師的他與同為專業人士的太太居於二線城市Offenburg一間擁過千呎花園的3層獨立屋。他說自己早已符合移民德國的條件,但認為護照只是旅遊證件,「一直都唔覺得有需要真係移民」。
不過現同時持有德國長期居留簽證和特區護照的他說,2015年銅鑼灣書店東主、瑞典籍桂民海被安插內地車禍肇事罪名,一連串「被失蹤」、「被認錯」等,令他萌生放棄中國國籍的想法,「香港人即使持有外國護照,都無辦法當是護身符。係要剪咗香港本護照,再拎外國護照先係真正護身符,如果唔係佢都會講你首先係中國人(拘捕你)」。
石續指,《逃犯條例》修訂更成了他「剪護照」念頭的「催化劑」,「桂民海事件畀咗壓力,但修例真係驚,香港好多人都驚」,故現時正辦理移民德國手續,放棄中國國籍,「如中國政府拉我,起碼德國政府會出手先」。
石說,反對修例是因為無人能擔保到內地的司法制度不會改變,不是乖乖奉公守法便能事不關己,「例如我同你(蘋果)做訪問,之後我要去上海公幹,佢唔喜歡就可以生安白造一個罪名畀你。呢條條例令佢哋做呢啲事輕鬆好多,未有修例已經有洗頭艇,而家有咗(修例),直頭係予取予攜,洗頭艇都唔使,直接用咁方便嘅法例去老屈,你仲要無得拗喎」。
他又說,對於本民前黃台仰和李東昇獲德國政府庇護,毫不驚訝,「香港有政治難民都係遲早嘅事」,因近年已發生不少港府不能保障市民的事例,但看見香港年輕人為信念奮鬥,卻被當「暴徒」,始終非常傷心。他認為無論持有哪本護照,自己仍是香港人,「母語係廣東話,長大嘅地方係香港,無可能嚟咗德國就將過去記憶抹殺」。
石表示,10年前德國太太問他香港會不會未來變成中國另一個城市,沒有言論自由和禁用Facebook,「我仲好記得我當時同佢講,邊有可能啊,好安全嘅、有分別嘅,有一國兩制。過咗幾年後諗返咁講,係何其天真」,認為回歸時,包括他自己在內,不少人很相信一國兩制,「呢種溫水煮蛙方式,真係去到就嚟熟先realize(知道)」。
記者 李詠希德國柏林直擊
民陣6.9反惡法遊行
日期:6月9日(日)
集合地點:維園草地
時間:下午2時30分集合、3時正起步
遊行路線:維園草地遊行至金鐘添美道立法會
(資料來源:民陣)
---------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
empty
石賈墨是「香港人在德國」Facebook的版主。何家達德國傳真
empty
港人工程師石賈墨(右)居德10年,但一直未有辦理正式移民。石賈墨提供生活照