現任新世界發展有限公司執行副主席兼總經理鄭志剛，噚日得到法國政府頒發法國藝術與文學軍官勳章，之前梁朝偉同杜琪峯都攞過。此榮譽勳章乃為表揚對法國文學同藝術領域中有傑出貢獻嘅人士。

噚日鄭志剛親自去法國總領事官邸授勳，佢致詞時話：「感謝法國政府頒發的法國藝術與文學軍官勳章。感謝家人、好友及工作團隊一直與我在文化次路上共同進退，將創意之旅全球普發化。」可能好多人只係知道佢係已故新世界發展有限公司創辨人鄭裕彤嘅長孫、鄭家純嘅仔，已經被欽點為第三代接班人，唔明點解法國會表揚佢喺文學同藝術方面嘅貢獻。其實佢來頭都唔少，喺美國哈佛大學東亞文學系畢業，2014年獲頒薩瓦納藝術設計學院（SCAD）人文學科嘅榮譽博士學位，又喺日本選修藝術文化課程。多年嚟佢一直宣揚跨國、跨文化交流。之前就同東京宮同莫奈基金會等法國著名藝術機構進行文化合作。08年創立K11商場，開創先河成立全球首個「購物藝術館」，成功結合藝術同商業模式。

更多娛聞，喺晒《娛果》
http://fb.com/appledailyent