36歲嘅蕭亞軒(Elva)愛嫰男，先後同細12年嘅柯震東、細4年嘅新加坡有錢仔石正祥(Elroy)拍拖，可惜兩段姊弟戀都唔可以開花結果，近日傳出Elva又有新男友喇!而呢位疑似新歡，原來係一位外籍高大猛男，個樣望落30幾歲，終於拉近距離......年紀方面。

今日喺微博有位帳號叫「八卦大嘴蛙」嘅網民，po咗張Elva同外籍男同行照。拎住咖啡嘅Elva冇乜化妝，而外籍男望落好大隻，件白恤衫逼到就爆鈕咁滯。其實喺月頭已經有讀者爆料，話見到Elva同外籍猛男同兩個朋友一齊食晏，日頭已經飲晒香檳，讀者形容成個食飯過程入面，男方都含情脈脈咁望住Elva。

據Elva身邊朋友爆料，呢位新歡係朋友介紹識，佢哋拍咗拖只係3個月，Elva因為驚呢段新戀情見光死，所以唔想公開戀情，仲叫晒身邊啲閨蜜封口。而Elva經理人公司就回應話：「藝人私事不回應。」