工聯會繼2011年後，今屆區選重施故技，派小花陳穎欣去深水埗麗閣硬撼民協馮檢基，成功將馮拉落馬。小花幫工記贏咗一場打咗十幾年嘅仗，自然成為傳媒焦點、工記掌上明珠。但小花當選冇耐，就有流言蜚語傳出咯！
花生友聽聞工記內有唔少人擰晒頭，話呢次被人拆祠堂。事關喺九龍西入面，工記唯一現任區議員黃潤昌以45票之差連任失敗，其他參選人亦輸埋，換言之，小花成為工記喺九西唯一區議員。
聽聞黃潤強衰咗嘅其中一個原因係選舉資源不足，而工記為栽培呢朵小花就用咗好多資源。眾所周知，明年立法會選舉九西加多一席，工記點會唔恨呢個位！但經過今次區選，工記何來有足夠樁腳呢？

恐向民建聯靠攏

更大問題係，雖然小花屬工記人，但其實今次佢係打住工記及民建聯旗號參選，民記都花咗唔少資源喺小花身上，好似民記主席李慧琼就專登喺投票日為小花催票，聽聞蔣麗芸亦好錫小花。難怪有工記中人擔心，明年立法會選舉，無論直選或超級區議會界別，小花到底係工記定民記樁腳先？
有人特別提到投票當日，工記只得會長林淑儀幫小花站台，真正嘅吸票機器、榮譽會長鄭耀棠同陳婉嫻都冇現身，有人疑似煽風點火話喎，莫非驚小花養唔熟，只向民記靠攏，大哥大姐唔想益咗佢而唔埋身？

花生友
周二、四刊出