年屆67歲嘅日本傳奇男歌手澤田研二，噚晚喺東京舉行每年一度嘅新春演唱會，吸引5千忠實歌迷捧場。

澤田研二於70至80年代紅極一時，又曾以前衞嘅中性形象風靡亞洲歌迷，雖然外型已不再瀟灑，但依然喺樂壇佔有一定地位。澤田研二今次唱出23首作品，當中包括以往嘅首本名曲，佢趁Encore前向台下觀眾講：「最近一到黃昏就開始想瞓，聽覺亦越來越差，但可以繼續唱到歌就得，希望能夠無休止地唱下去。」贏得台下歌迷熱烈掌聲。

澤田研二當年於亞洲舉足輕重，不少有份量嘅香港歌手都受佢影響，好似林子祥就曾以一曲《澤田研二》向佢致敬，鄭少秋都模仿過澤田研二嘅經典形象翻唱《OhGal》，仲有香港人耳熟能詳嘅《讓一切隨風》、《H2O》都係改編自澤田研二作品。