嘩嘩嘩，打到嚟嘞！中央對佔領中環嘅打壓真係越嚟越厲害，否則使乜發動左派「文攻」抹黑、出動愛字頭大軍「武鬥」佔中支持者？但佔中三子就算幾咁和平，都係時候反擊啦！佢哋係斯文人，當然唔會學左派咁出揦鮓招，八方聽聞，佢哋會喺稍後時間發動「網絡攻勢」，唔係用黑客，而係用短片進行大規模宣傳，希望佔中運動可以成功入屋。

到底呢項網絡攻勢係乜傢伙？據聞係一場短片進擊戰。佔中三子已經搵嚟一隊專業攝製隊，走訪各行各業嘅「素人」、即係普通人，叫佢哋對佔中運動提出一個疑問，例如順嫂可以問：「點解佔領中環而唔係佔領牛頭角呀？」的士司機亦可以質疑：「我哋呢啲普通人係咪都可以參加先？」總之佔中倡議人戴耀廷教授會逐一解答，希望坊間更清楚佔中運動係乜東東。
為咗市民更加容易消化，據知呢系列短片，希望盡量喺一分鐘之內完成，事關家陣嘅城市人耐性有限兼貴人事忙，長啲都未必有耐性睇得完。呢啲「佔中一分鐘」短片拍攝完，除咗佔中運動facebook，都會透過YouTube發放。

度緊易上口slogan

八方仲聽聞，佔中運動度緊句slogan，希望易上口兼夠諗頭，唔好俾幫港出聲嘅周融謬論搶晒「風頭」。原來佢哋仲贒中袋巾太太Carol嘅辦事兼籌款能力，希望搵佢幫手專責搞籌款，搵定啲錢為佔中運動做支援。

mailto:[email protected]