韓國男團EXO噚日起、一連兩日於首爾舉行《EXOPLANET #3 – The EXO'rDIUM》嘅encore演唱會，成員今日就舉行記者會，透露EXO即將推出新歌回歸。

成員伯賢表示：「主打歌已經完成製作，係成員都非常滿意嘅作品。」而隊長Suho談到EXO今年嘅目標，就話：「今年都用心活動，希望能拎第5個大賞，但比起呢個，最大目標係希望成員身體健康，一齊於舞台上表演。」

另外，噚晚一場表演中，Kai就大騷腹肌，連世勛都表示：「見到Kai積極健身後嘅演出，我都受到刺激，都要努力健身啦。」而是次演唱會，中國成員Lay雖然缺席，不過都有於網上留言為隊友加油。