香港每年都會舉辦香港攀樹錦標賽，各地好手會進行大比併。選手喺初賽要就工作攀爬、空中拯救、投擲繩索等比併，躋身決賽後就規定喺30分鐘內爬到樹上四個工作站，並完成敲鐘、投擲枝條等動作。

比賽上月喺城門郊野公園舉行，嚟自香港、內地、台灣同澳門嘅攀樹好手同場較量，結果香港包辦男女組阿一，張凱祺喺女子組摘冠，林楚豹就喺男子組奪魁，「女子」兵團都係註冊攀樹師，明年8月代表香港到美國俄亥俄州出戰國際攀樹錦標賽。

原來34歲嘅張凱祺已經連續三年喺女子組摘冠，佢接受政府新聞網訪問時透露，大自然美景令佢由文員轉為攀樹師，愛上爬樹又參加比賽，仲將興趣轉為事業：「香港山多水多，我每天工作像探險一樣，不管哪裏都有不同風光，其實挺好的。」

香港現時原來有102人係註冊攀樹師，得5位係女性。要考註冊攀樹師，最少要有18個月攀樹經驗，並持有急救同空中拯救證書，資格試每年約4月及10月舉辦，分筆試同攀樹技巧測試。