真人版嘅動漫電影拍完一套又一套，嚟緊有一套好多電玩迷要留意，因為《真．三國無雙》改編成真人版，仲有好多香港人演出。之前有消息指，古天樂將飾演呂布、王凱飾演曹操、韓庚演關羽、楊佑甯演劉備同埋古力娜扎演貂蟬，仲有劉嘉玲演鑄劍堡堡主。（新聞連結： http://bit.ly/2vxKswa ）

投資方就係蕭定一刻意保持低調，不過今日佢喺微博放咗少少風，擺咗張呂良偉嘅造型相，原來佢演一代霸主袁紹。就咁睇落，呢套戲服都幾俾心機，同原著相似度都有9成，唔輸俾啲專業cosplayer。

至於蕭定一就喺微博話，同呂良偉有過唔少合作，覺得佢充滿霸氣，所以演十八路諸侯盟主真係好合適。