時近季尾，跑馬地及沙田馬場的草地狀況變差，無論採用哪一條移欄跑道，都是前領馬佔盡優勢。

相比之下，沙田泥地跑道更為公平，好似「金地飛客」呢匹泥地怪傑亦能夠後上贏馬。今期（11日）第二場「駿瑪」及第八場「巴基小子」，上仗跑泥地賽都入三甲，今次再跑泥地，有力問鼎頭馬。

第八場三班泥地1200米，「巴基小子」連續三仗入位近況出色，上仗跑泥地同程起步大脫腳落後極遠，之後急急上前收復失地，前段耗力甚多，但直路依然能夠從外欄追入Q，姿態更勝該場頭馬「仁愛之星」，證明泥地性能頂呱呱。今次強敵已去，對手水準仲弱過上仗，如出閘順利，唔用「巴基之星」跑法的話，贏馬呼聲應極高。

同場「盈利駿馬」季初在二班贏同程，如今跑三班賽可賺級數，今次更配潘明輝減十磅，實際上以70分出戰，即是比季初贏馬時低12分，評分非常着數。「快樂魔王」走勢有起色，父系血緣擅跑泥地，轉戰泥地必須提防。「新威龍」上仗衝得近，今次強配莫雷拉戰意鮮明，要拖埋。