韓國樂壇年度盛事《MAMA音樂頒獎禮》今年舉行一周盛典，分別喺越南、日本及香港三地舉行，當中香港一站陣容最鼎盛，除咗有「大長今」李英愛、新婚人夫宋仲基、《Running Man》女星宋智孝等任嘉賓外，人氣男團EXO、BTS(防彈少年團)、Wanna One等藝人亦有出席，就連事隔3年回歸樂壇嘅男團Super Junior(SJ)亦俾面出席並落力演出。

不過《MAMA》過後就爭議聲不斷，唔止有粉絲表示賽果不公，紛紛指大會有造馬之嫌，SJ隊長利特亦似乎對《MAMA》有所不滿，前晚出席盛會後於Instagram寫道「嚟呢度做咩？」，引起熱鬧討論。

前晚《MAMA》香港站中，雖然SJ被安排到近晚上10點先表演，但期間SJ坐喺台下睇後輩演出時，亦有落力應援，為後輩加油打氣。而SJ出場時，更與數十名舞蹈員搭配磅礡嘅音樂開場，排場、氣勢都令觀眾、台下藝人都讚嘆，但最終SJ僅僅表演咗一首新歌《Black Suit》。

利特嘅貼文令粉絲大感心痛，紛紛留言安慰偶像，而隊友銀赫亦以玩笑形式「哥，香港奶奶鬼要出來了，快睡覺吧」留言安撫。而目前為止，利特亦未有就相關貼文回應。

另外，SJ來港入住嘅W酒店為歡迎眾人，特別為SJ送上驚喜。眾所周知SJ成員金希澈花名為「宇宙大明星」，而希澈又視邱淑貞為女神，以及鍾意日本動漫公仔ASUKA，酒店方面就特別喺鏡上貼上邱淑貞、ASUKA嘅相，並寫上「宇宙大明星」嘅字句，令希澈開心到上載IG同粉絲分享。

更多韓流，喺晒《娛果》
http://fb.com/appledailyent