當年今日
關於我們

【維基百科】19年前的王維基: 創業多謝車公先!

蘋果日報 2014/12/04 06:00

王維基城市電訊香港電視

王維基幾經辛苦,香港電視(1137)總算出到世,過程入面,大家有眼見,就算被多番阻撓,佢都唔認命,諗計將港視成真。查實佢創業多年,都真係幾經風雨,但正正因為唔認輸,先造就一代「電訊魔童」。

近日facebook瘋傳一篇1995年《蘋果日報》專訪,當年仲係城市電訊地區董事嘅王維基,就講到佢嘅發跡史。

原來於「六四」後,令原本做Sales嘅王維基決心移民去加拿大,點之過到去後,3個月搵唔到工。好啦,到IBM請佢,但叫佢做研究工作,佢又唔鍾意,於是就決定喺加拿大個「跳蚤市場」做小販賣成衣,然後輾轉再賣電腦。

咁岩當年加國決定放寬電訊業,佢就再轉行,同幾個朋友搞長途電話公司,創立城市電訊,90年返香港問人借錢,佢就話一落機去沙田車公廟求籤,「仲記得支籤係上上籤,話個小國向大國打仗,最後小國吞併咗個大國。」

之後嘅結局,睇怕大家都知。電訊公司越做越大,更促使香港開放電訊業,92年將城市電訊帶返香港,當年CTI殺價超人,殺到其他公司一個措手不及,至99年再成立香港寬頻。