新世界純官真係近日紅人，既搵冧巴溫資深大狀挑戰立法會，又被周刊影到同王穎妤敍天倫，有人指佢近年頻打官司，全靠有法律背景嘅王穎妤教路。不過，阿媽教落「貧不與富鬥，富不與官爭」，政圈中人多認為純官同立法會打官司唔係咁簡單，況且純官係順德人㖭！

左報批立會權力膨脹

果然愛國報章《文匯報》噚日社論就力挺呢單官司，有人睇完之後，覺得好可能係體現中央意志嘅觀點，不排除西環第二支管治隊伍又發功，搵機會教訓立法會。社論主要質疑立法會利用「特權法」膨脹權力，批評議員傳召證人權力不受限制，衝擊香港一啲重要制度同公共利益，簡而言之即係認為議員太惡。
議員係咪真係惡晒呢？雖然議員可以掟蕉，但提案立法權諸多限制，最多有否決權，因此對於呢個問題八方都唔敢亂講，或者純官今次不惜工本打官司，都係想搵出一個所以然來。不過左報卻畀咗頂「立法會擴權意識明顯」帽子班議員，指議員近年動輒亮出特權法呢把尚方寶劍，並指立法會引用特權法調查雷曼事件，衝擊香港作為國際金融中心及商業中心地位。

人大釋法除尚方寶劍

呢啲批評立法會嘅言論其實唔算新鮮，基本上同中央「護法」口徑一致，認為立法會唔應該挑戰行政主導政治體系，最好學似領導人咁講，行政、司法、立法三權合作，咁就天下太平社會和諧。八方同幾個政圈人士傾過，一般估計呢場官司唔會拖延太長時間，因為新世界方面提出嘅理據比較簡單，相信立法會好易打得甩，亦因為咁，唔少議員先覺得事有蹺蹊，思疑冇咁簡單。
估計事態發展，政圈揣測後果可大可小，事關呢單官司不論任何一方輸咗都會上訴終審法院，假如終院受理，由於涉及審理《基本法》條文，屆時會唔會有人要求人大釋法呢？正如左報社論話，釐清特權法權限先係呢單官司焦點，誰最權威釐清呢個憲制問題，答案呼之欲出，將立法會尚方寶劍變成膠刀，阿爺豈不快哉！

mailto:[email protected]