葉翠翠今日喺中環舉行生日慈善派對，老公周曉東同歲半嘅大仔小王子、兩個幾月嘅細仔小小王子齊齊以粉紅色家庭裝現身。翠翠話今次生日會，fans要畀留位費，全數會捐去救助毛孩嘅團體。

大會邀得100位fans到場，小王子做晒焦點搶fo，翠翠笑謂：「好似佢係主角咁，我都接受咗呢個事實，永遠post佢啲相嘅like多過我好幾倍。」

今個月10號37歲生日嘅葉翠翠，自爆老公唔記得佢生日：「連生日快樂都無，禮物佢話後補都未送，當冇㗎喇！不過佢隔咗個星期買咗個蛋糕返嚟，小王子好開心，以為同佢慶祝生日，好搞笑。」問佢仲會唔會追多個女？翠翠笑言再生會冇命：「陀B、生B、收身再陀，真係好攰，兩個夠晒數啦，再生屋企會反轉。我係鍾意女仔嘅，fans都叫我生，但真係唔會喇。」

講到要幫小王子搵學校，翠翠話原來好煩：「真係好難㗎，要認眼耳口鼻同顏色，不過我唔會催谷佢，我谷自己都未谷到，未必可以谷到佢。」

精選娛聞，喺晒《娛果》
http://fb.com/appledailyent