發現男友偷食，似乎都係正常生活一種。

但係《延禧攻略》深情傅恒俾女友踢爆「偷食」，過程就有點曲折離奇。

傅恒一角，飾演者叫許凱，一位聲稱係佢女友嘅女子——網紅大金，稱憑24歲女星白鹿網上嘅一張相，認出相中嘅床單，係佢（即大金）同許凱交往時買嘅。

一張床單透過咁嘅方式令私情被揭，都幾特別。

《延禧攻略》已經大結局咗，但有關佢哋嘅新聞、特別係負面嗰隻，就一直傳之不絕。仍屬新人嘅許凱，與白鹿齊擔任古裝仙俠劇《招搖》男女主角，兩人因而傳出緋聞。近日有傳媒聲稱影到許凱前往白鹿家中，仲過埋夜，呢單嘢今日喺大陸網洗版咁滯。

大陸網媒紛紛向許凱及其公司求證，但一直未獲回覆。再睇番啲相，都係得啲背脊，搵一張「正常清楚」嘅都有難度。許凱嘅工作人員曾回應：「我也不清楚，這圖全是背影，這都拍的是誰？」咁許凱同白鹿係咪拍拖？對方表示：「那我就不知道了。但我看上熱點了，我們公司會及時處理的。」不過之後就再冇回應。傍晚六點左右，有網民喺北京機場見到許凱。

網紅大金自稱係許凱前女友。許凱走紅後，佢就出Post話發許凱係賤男，同好朋友嘅女友白鹿一齊，又聲稱自己曾遭許凱「家暴」。關於「家暴」傳聞，許凱月前已經否認咗，話「我曾經是壞男生，所以更渴望有一天成長為一個好男人。」、「我做錯的每件事兒，我都承認。有爭吵，有推搡，有撕扯，不是家暴」