當年今日
關於我們

隔牆有耳:燈死侵侵 激嬲連登 
燒山憤怒鳥 (李八方)

蘋果日報 2020/11/06 00:00


一直被網民形容燈力十足嘅蕭若元噚日終於喺YouTube提到「燈神」呢個身份,話雖然從來唔會正面回答,但今次終於忍唔住出聲解畫,神情嚴肅:「我認真講一次,以後唔再講」!

「我有乜能力改變世界」

事源燒山喺自己YouTube 出過唔少講美國大選嘅影片,雖然佢講咗話睇唔透,但都有對民調同選情分析,其中有兩條片標題係「特朗普形勢向好」、「有人計到特朗普會山泥傾瀉式大勝?」以當時點票結果睇,特朗普確係有望當選,點知之後形勢逆轉,網民即開帖大鬧燒山做乜又「燈」:「你撐邊個就輸邊個,啲分析燈X到X街!」更有啲難聽到八方都唔好意思轉述呀,連燒山舊拍檔黃毓民都喺fb出帖抽水:「燈神永垂不朽,侵粉沉冤難雪」。
燒山可能真係憤怒了,特登出片解釋佢唔係「燈神」:「任何有少少sense嘅人都諗到,我有乜能力改變呢個世界嘅大事?」佢嬲爆咁話:「講十樣嘢入面永遠有三、四樣唔準,你永遠就係講嗰三、四樣,呢啲係低能㗎!」網民見到都話,「相信佢好唔開心」,唔少網民即刻幫口:「𠵱家(有網民)一輸就賴落燒山度」。今次燒山慘變「出氣袋」,八方都只好相勸一句「上連登,勿認真」。
李八方
empty