今年農曆年宵市場，惡搞民建聯黨徽件「禮義廉」T恤在維園熱賣，成為全場焦點。不過民建聯好小器，作為全港第一大政黨都容忍唔到異見，竟然唔畀市民批評、諷刺佢哋，衰到向海關投訴「禮義廉」T恤，指件衫侵犯佢哋黨徽版權，要海關做嘢。海關不負所託，出動掃走百幾件衫，但亦多得海關咁賣力，「禮義廉黨」呢個稱號亦街知巷聞，民建聯得不償失。

充公T恤唔發還

事隔大半年，當日高調執法嘅海關，早前原來靜靜雞接觸社民連，表示不會就「禮義廉」T恤單嘢作出檢控，社民連主席陶君行同八方講，海關無詳細解釋，不過唔講都知原因，呢單嘢nocase嘛。雖然唔告件衫，卻唔代表事件告一段落，由於海關話唔會發還充公咗嘅T恤，社民連覺得咁做形同強搶民產，因此正在徵詢法律意見，不排除反告海關，不惜同政府對簿公堂，都要爭取釋放「禮義廉」T恤。
海關為乜堅持扣留件衫呢？關長袁銘輝唔會留為自用啩？實情如何，留待海關同社民連慢慢拆。光陰似箭，日月如梭，原來下星期一又係一年一度維園年宵市場攤位公開競投大日子，過去一年物價狂升，樓價更加有上冇落，呎價屢創新高，食環署都緊貼市場情況，調高攤位拍賣底價，大快餐攤位加46,040元至276,220元，一般快餐攤位今年底價147,950元，高去年24,660元，濕貨就升180元至8,000元。

市旺搶高競投價

一心發新年財人士目標嘅乾貨攤位，則由去年28,850元加至30,690元，如果以攤位面積計，呎價同豪宅不遑多讓。今年個市咁旺，競投價錢可能搶得好高，唔夠首期上車嘅80後，唔知有冇興趣博一博，搵轉快錢幫補置業大計？今年「禮義廉」T恤喺年宵大出風頭，八方預計明年都有唔少政治話題年貨應市，如果成功爭取釋放禮義廉T恤，當然要再推出應市啦。
mailto:[email protected]