瑞典後衛域陀連迪路夫今夏由葡超賓菲加轉投曼聯後，到依家都未喺英超上陣過，對於呢位新兵嘅情況，曼聯領隊摩連奴話：「急唔嚟嘅！」

連迪路夫孭住3,070萬鎊嘅轉會費入「魔」，但係開季到依家都唔係球隊嘅正選後衛，不過摩佬就一啲都唔擔心，話只要慢慢嚟嘅話，連迪路夫就可以證明自己。摩連奴喺禮拜三晚歐聯鬥莫斯科中央陸軍嘅歐聯分組賽賽前表示：「我哋會畀多啲時間佢，唔會畀咩壓力，中堅喺球場上係一個好特別嘅位置，佢需要多啲時間。呢樣嘢我會畀佢，有時間但係無上陣機會，咁進步當然會慢啲。其實佢都已經喺歐聯鬥巴素爾，同埋英格蘭聯賽盃贏伯頓上過陣，未來都會有更加多機會，佢慢慢會證明自己係OK㗎嘞！」