息影12年嘅90年代前艷星林雅詩（Grace）自從嫁咗畀商人老公，婚後育有一子，就專心相夫教子，不過，近日忽然宣佈出寫真新書，更搞到佢同老公婚姻亮起紅燈，今日有報道爆林雅詩同老公分房瞓5年，同丈夫冇性生活，又指佢因為被精神虐待嗌離婚，話老公唔照顧佢!

林雅詩今日接受本報電話訪問，直認林雅詩同老公嘅關係「名存實亡」，佢講：「分房瞓真係五年，性生活又冇刻意話點樣計過，我呢段時間係同囝囝瞓。」講到離婚，Grace就爆佢同老公最近一次鬧離婚，已經係一年前嘅事，目前就因為佢出寫真集，再次嘈交，林雅詩表示：「因為寫真集問題都有啲拗撬，其實一路冇同佢講，我冇講大話，我係冇講過畀佢聽出寫真，因為最近太多報道，佢知道嚟問我，跟住佢講啲唔係咁好聽嘅嘢。」

林雅詩又指，老公對現時嘅寫真根本係一知半解，佢講：「因為佢乜都唔知，剩係知係寫真，佢好師奶，剩係覺得寫真就有啲乜睇，或者可能露點呀！啲思想好古板，我有同佢講冇乜特別嘢，到時你睇到咪知囉，當然我自己知道個底線係邊！」講起今個月23號搞新書發佈會，會唔會邀請老公出席？佢稱：「我會問佢嚟唔嚟，佢未必嚟，我都會問聲佢得閒就嚟喇！」

咁問到林雅詩係唔係仍然想離婚？佢坦言：「如果往好嗰方面睇，我都係想挽救，唔想去到咁盡，我爹哋、媽咪都係離婚，我唔想行番佢哋條路，想有個happyfamily，但係好多嘢未去到最後唔知，可能離咗婚會更加好。」

林雅詩今次復出推出寫真集，強調係想擁有自己事業：「咁啱係有人搵我出寫真，我想番大陸登台，可以做吓其他嘢，其實我最主要唔係香港，我想話畀人知我返出嚟。」