鄭伊健、錢嘉樂同林曉峰今日喺九龍城為本月喺紅館舉行嘅演唱會進行綵排工作，不過其餘兩位演出拍檔陳小春同謝天華因為喺內地拍戲而缺席排練。

伊健三子分別拎住西瓜、椰青同波蘿出場，舞蹈員一身沙灘裝，充滿夏日氣色。佢哋仲安排咗兩位舞蹈員戴上天華同小春肖像嘅面具現身，由於面具係灰黑色嘅，佢哋笑言：「你兩個賺人仔賺到面無血色。」

近年男歌手開演唱會都興起除衫騷肌，問佢哋今次演唱會係咪都騷肌？佢哋笑指騷肌絕對冇問題，大家都有正常身形唔使操練。對於上次伊健喺演唱會中被木箱扑頭，佢哋笑言喺微博發起邊個想扑伊健頭，反應熱烈，嘉樂搞笑話：「伊健係幾好扑o架！」