大家以為NBA球星人工高待遇好，退休生活就一定好美滿；其實唔少球星都唔係好生性，有啲退休後不出幾年就搞到破產，最近就有2000年探花邁亞斯（Darius Miles）老破，仲衰到要拎大帝簽名波衫出嚟賣。另外有啲又會成日惹麻煩，好似曾經被譽為高中籃球天才嘅前NBA控衛泰費亞（Sebastian Telfair），就因為藏有槍械同大麻畀警察拘捕。

邁亞斯千禧年以高中生身份直入NBA，超強體格加上無限潛能，引到快艇用第三號籤挑選，不過到NBA戰場就麻麻地，9年生涯打過快艇、騎士、拓荒者同灰熊，2009年就退休，成就就真係冇乜；不過呢9年都執到超過6千萬美金（約4.7億港元）人工，唔好話慳慳地，中產生活都夠過世啦。

但宜家先35歲嘅佢，就真係唔生性，連年投資失利，加上支付一大班私生子生活費，唔單止身家敗晒，仲爭落2百幾萬美金，連住緊嘅大屋都要拍賣，稍為值錢嘅物品都要拎出嚟還債；包括唔少NBA球星物品，佢同騎士「大帝」勒邦占士（LeBron James）做過隊友，大帝簽名波衫就賣到1500美金，小鳥布特（Larry Bird）簽名波衫就賣到100美金，奴域斯基（Dirk Nowitzki ）簽名鞋就賣到375美金，連錄影帶、多士爐都要拍賣，加埋籌到12,780美金，叫做好過冇啦。

至於今年32歲嘅泰費亞，2004年跳過大學參加NBA選秀，畀拓荒者喺首輪13籤選中，但職業生涯不似預期，最後參與NBA嘅比賽係2014/15球季代表雷霆、係佢嘅喺NBA嘅第八支球隊。泰費亞2007年已經試過藏械而被捕，當時佢認咗罪仲畀聯盟判罰停賽三場。不過今次仲大鑊，佢喺美國時間星期日凌晨揸緊車時畀警察截停，車上仲有另一個18歲男仔，佢畀人喺車度搵到四把上滿子彈嘅手槍、一支半自動步槍、一件防彈背心同埋大麻等等。美國傳媒報道，泰費亞面臨六項重罪指控，包括非法藏械同非法著防彈背心，如果因為有關武器嘅指控被定罪，可能面臨最高入獄15年嘅刑罰！